Hjónaband II

  Þegar maður og kona hittast og verða ástfangin þá blossar upp mikill ástarbrími. Þetta endist vissulega mislengi en ekki varir þetta ástand endalaust. Þegar þessu sleppir þá er samt ástin eftir og hana þarf að rækta eins og pottablóm. Klippa burt dauðar greinar svo nýjar geti vaxið, vökva reglulega, þvo blöðin, skipta um mold og láta sólina skína á blómið. Þetta er líking við það sem við verðum að gera til að eignast gæfuríkt líf og vera ávallt ástfangin af maka okkar. Þegar daglega stritið hefst eftir sæluvímuna þá koma upp svo mörg mál sem hjónin þurfa að takast á við og þá kemur að ræktunarstarfinu. Þessi vinna þarf að vera á báða bóga og einstaklingarnir þurfa að mætast á miðri leið. Kærleikur og virðing er mikilvægur þáttur í heimilislífi ásamt samvinnu á öllum sviðum. Hjón þurfa að vera góðir vinir og fullkomið traust er gulls ígildi. Það traust má aldrei skemma á nokkurn hátt. Taka allar ákvarðanir saman -fjármálin og alla aðra þætti í lífinu. Þó verður hver einstaklingur að hafa ákveðið frelsi svo hann finni sig ekki þvingaðan á einhvern hátt. Allir skulu finna sig örugga og öllum á að líða vel á sínu heimili því þar á að vera griðarstaður fyrir alla fjölskyldumeðlimi og heimilisfriðinn skal enginn rjúfa. Það er auðvelt að skrifa þessar línur niður á blað en oft reynist fólki torvellt að lifa í samræmi við þær. Ef ást og virðing ríkir í hjónabandinu þá er eftirleikurinn auðveldari.

 

(Í upphafi skyldi endirinn skoða)

Athugasemdir

[Sigga Guðna 21.5.2008 kl. 23:08]

já nákvæmlega - afhverju er þetta svona erfitt ? keep on going !!!!!!

[Guðrún Þóra Hjaltadóttir, 22.5.2008 kl. 17:51]

Þetta reynist samt svo erfitt. þó svo að þetta sé svo borðliggjandi í byrjun sambands.